Sipas raportimeve të fundit nga Italia, Paolo Maldini dhe Ricky Massara janë shkarkuar nga pozitat e tyre te Milani pas një takimi të tensionuar me pronarin Gerry Cardinale.
Takimi kishte për qëllim të përcaktonte strategjinë për sezonin e ardhshëm, por raportime të shumta pohojnë se ky takim shkoi shumë keq, veçanërisht midis Maldinit dhe shefit të “RedBird”, Cardinale.
“Calciomercato” ka raportuar se Maldini dhe krahu i tij i djathtë Massara janë shkarkuar nga Cardinale. Deri më tani nuk ka ende asnjë njoftim zyrtar nga “kuqezinjtë”.
Kjo do të thotë një transformim total i strukturës në krye të klubit. Maldini dhe Massara kishin qenë në krye të transferimeve dhe negocimit të kontratave.
Do të ishte një largim i dhimbshëm për tifozët e Milanit, pasi Maldini ka qenë në klub gjatë gjithë karrierës së tij, fillimisht si lojtar dhe më pas si drejtor nga viti 2018.
Geoffrey Moncada duket se do të jetë drejtori i ri teknik i Milanit.
