“As dy vëllezërit e mi dhe as prindërit e mi nuk e kanë shkelur pragun e ndërtesës së Qeverisë së Kosovës dhe nuk do ta bëjnë këtë”.
Kështu ka thënë kryeministri i Kosovës, Albin Kurti kur është pyetur në konferencën për Integritetin e Informacionit DISICON, ku temë kryesore ishte rreziku nga sulmet kibernetike.
I pyetur për punësimet në Radio Televizionin e Kosovës, Kurti ka thënë se mbase është kryeministri i parë në Kosovë që nuk ka asnjë të punësuar me mbiemër të tij në ndonjë ministri.
“Mbase jam kryeministri i parë në Republikën e Kosovës i cili nuk ka asnjë me mbiemër të tij të punësuar në asnjë prej ministrive. As dy vëllezërit e mi dhe as prindërit e mi nuk e kanë shkelur pragun e ndërtesës së Qeverisë së Kosovës dhe nuk do ta bëjnë këtë”, ka thënë ai.
Ai shtoi se nëse ka dikush që është kundër nepotizmit, beson që është qeveria dhe ai si kryeministër.
“Nëse ka dikush që është kundër nepotizmit, besoj që është kjo qeveri dhe unë si kryeministër. A jemi të përsosur, jo… Unë jam për t’i parë njerëzit me dy kritere, integriteti profesional dhe personal, le të jetë i cilësdo parti”, ka shtuar Kurti.
