I dërguari i posaçëm i Bashkimit Evropian për dialogun Kosovë-Serbi, Miroslav Lajçak, pas takimit me kryeministrin e Kosovës, Albin Kurti, në Prishtinë, është takuar me kryetarin e Mitrovicës së Jugut, Bedri Hamzën.
Pas këtij takimi me Hamzën, ka kaluar në këmbë në urën e Ibrit, ku do të takohet me përfaqësues serbë të shoqërisë civile në “Shtëpinë e Bashkimit Evropian”, ndërtesë në hyrje të sheshit afër urës së Ibrit.
Në takim ndër të tjera Hamza ka thënë se është biseduar për çështjen e rihapjes së Urës së Ibrit.
Ai ka thënë se duhet të respektohen ligjet dhe liria e lëvizjes.
Ndërkaq, Lajçak ka thënë se vendimi për hapjen e Urës së Ibrit duhet të merret në dialog.
Ai tha se është përkrahës i i fort i vendimeve dhe zgjidhjeve të pajtuara.
Tutje u shpreh se temat që përfshijnë dy palët duhet të kenë pajtueshmëri nga të dyja shtetet.
“Ura e Mitrovicës ka qenë pjesë e dialogut prandaj unë mendon që vendimi për hapjen duhet të merret në dialog. Gjithçka ësjhtë në dorën e dy palëve. Unë dua që hapja e urës të jetë kontribut për stabilitet”, ka thënë ai.
Gjersa ishte në Prishtinë, Lajçak është pyetur nga gazetarët për qëndrimin e Bashkimit Evropian mbi modelin kroat për Asociacionin e Komunave me shumicë serbe.
Emisari evropian ka thënë se BE-ja pranon atë që është në pajtim me vlerat dhe normat evropiane.
Ai ka thënë se kjo është theksuar që prej fillimit nga BE-ja dhe se janë të qartë në lidhje me këtë qëndrim.
“Për BE-në e pranueshme është ajo që është e bazuar në normat dhe vlerat e BE-së dhe që është në pajtim me modelet ekzistuese evropiane”, ka thënë Lajçak.
