Një fëmijë 5-vjeçar është kafshuar nga qentë endacakë të martën afër shtëpisë së tij në fshatin Milloshevë të komunës së Obiliqit.
Ai të martën është trajtuar në Klinikën Emergjente të Qendrës Klinike Universitare të Kosovës.
Drejtori i Klinikës Emergjente, Naser Syla, ka thënë se gjendja e fëmijës është stabile dhe se tani është duke u trajtuar në Klinikën Infektive.
“Ka qenë mbrëmë në klinikën Emergjente është trajtuar aty, gjendja e tij është stabile, por është përcjellë për Klinikën Infektive për ta përcjellë gjendjen e për shkak se është kafshuar nga qenë të rrugës, dhe duhet të përcillet për shkak të kohës së inkubacionit të virusit”, ka theksuar Syla.
Për këtë kanë shkruar në Facebook edhe familjarë të fëmijës që është sulmuar.
Një familjar i tij ka treguar se ai është shpëtuar nga një punëtor i ndërtimtarisë.
“E falënderojmë edhe një punëtor të ndërtimtarisë i cili e ka shpëtuar D.K, ku po të mos ishte ai, Zoti e di se çfarë do të kishte ndodhur me të”, ka shkruar një familjar i tij.
Ai ka kërkuar nga niveli lokal dhe qendror që të ndërmarrin hapa lidhur me këtë problem.
“Po bëjë pyetje prej nivelit lokal e atij qendror edhe sa raste duhet të ndodhin për intervenim apo eliminim të qenve endacakë. A thua a ka ndaj përgjegjësi dikush nga kjo hallke zinxhirore e pushtetit, që fëmijët as afër shtëpisë së vet mos të jenë të lirë të luajnë e të jetojnë jetën fëmijërore. Shpresojmë që do të bëhet një zgjidhje për të luajtur si fëmijë të lirë”, ka shkruar ai.
