Ministria e Financave Punës dhe Transfereve (MFPT) njofton familjet përfituese të Asistencës Sociale se që nga ky muaj (prill 2023) do të pranojnë mjetet e asistencës në llogaritë private bankare, bazuar në konfirmimet që kanë dorëzuar në Qendrat për Punë Sociale.
Andaj, MFPT bëri të ditur se përfituesit e asistencës sociale duhet të drejtohen tek zyret apo pikat e bankave komerciale, ku i kanë llogaritë e tyre, për të pranuar mjetet e asistencës.
“Në rast se ndonjë familje nuk pranon mjetet financiare për asistencës sociale për muajin prill 2023, atëherë duhet të paraqiten sa më parë në Qendrën për Punë Sociale në komunën e tyre dhe të njoftojnë zyrtarët e ndihmave sociale”, thuhet në njoftim.
Nga ky vendim përjashtohen përfituesit e Asistencës Sociale me status të azilantit dhe ata do të vazhdojnë të pranojnë asistencën në zyrat postare.
Kujtojmë se deri më tani, asistenca sociale në Kosovë është shpërndarë përmes zyreve postare.
