Ministrja e Arsimit, Shkences, Teknologjisë dhe Inovacionit, Arbërie Nagavci, së bashku me kryeministrin e Kosovës, Albin Kurti, prezantuan sot Draftin e Programit Kombëtar të Shkencës për vitin 2023-2028.
Ministrja Nagavci bëri të ditur se ky draft është rezultat i punës së nisur rreth dy vjet më parë, duke rikthyer në vëmendjen publike një proces i cili ishte lënë krejtësisht në harresë për një dekadë.
Ajo tha se ky program është një nga dokumentet më të rëndësishme shkencore në vend, që përcakton fushat shkencore që duhet të zhvillohen dhe mbështet zhvillimin e kapaciteteve shkencore institucionale.
PKSH udhëzon politikat e kërkimit shkencor në Kosovë, dhe është orientuar në gjashtë objektiva:
-Zhvillimi i një sistemi efektiv dhe inovativ të kërkimit shkencor;
-Zhvillimi dhe aftësimi i kapaciteteve njerëzore për veprimtari kërkimore-shkencore;
-Zhvillimi i infrastrukturës kërkimore-shkencore;
-Ndërkombëtarizimi i veprimtarisë kërkimore-shkencore;
-Ndërlidhja mes shkencës, ekonomisë dhe shoqërisë;
-Përsosmëria e veprimtarisë kërkimore-shkencore në fushat specifike.
Nagavci thekson se Programi në fjalë ka gjashtë prioritete: shëndeti, shoqëria, burimet natyrore, bujqësia, marrëveshja e gjelbër, dhe digjitalizimi.
“Ky dokument është në diskutim publik që nga data 7 prill 2023 dhe do të jetë i hapur deri më 4 maj 2023 andaj, mirëpresim çdo koment apo sugjerim tuaj. Me besimin se dokumenti final do të jetë i plotë dhe cilësor, uroj punë të mbarë dhe avancim të hovshëm të shkencës dhe inovacionit në Kosovë!”, shkroi Nagavci në Facebook.
