Zëdhënësi i Qeverisë së Kosovës, Përparim Kryeziu ka thënë se ka pasur ndërhyrje nga Serbia në procesin e zgjedhjeve në katër komunat veriore të mbajtura më 23 prill.
Sipas tij, qasja destabilizuese e Serbisë bie ndesh me marrëveshjen e Ohrit.
“Ka shkelje të asaj që është dakorduar në Bruksel, që nga vendimet për shtyrjen e zgjedhjeve dhe mbajtjen e tyre më 23 prill, është arritur një pajtueshmëri në Bruksel e pastaj në Ohër por që është shkelur ky nen nga Serbia”, ka thënë Kryeziu.
Ai ka thënë se zgjedhjet janë mbajtur dhe ka pasur organizim nga institucionet përkatëse përfshirë KQZ dhe organet e sigurisë të cilat sipas tij i kanë ofruar të gjitha kushtet e nevojshme që këto zgjedhje të mbahen.
Ai ka thënë se këto shkelje që i ka bërë Serbia do të komunikohen në takimet e ardhshme që do të jenë me ndërkombëtarët.
“Cdo veprim që klasifikohet si shkelje komunikohet në takimet që i kemi me ndërkombëtarë. Nuk është hera e parë që Serbia ka një sjellje të tillë, mbase për dallim deri më tani me marrëveshjen bazë, Serbia ka treguar me veprimet e saj që shkel marrëveshjen bazë”, ka vijuar Kryeziu.
Lajmi në përditësim..
