Qeveria e Kosovës ka nisur mbledhjen e radhës dhe kryeministri Albin Kurti me fillim të saj ka dënuar sulmin që i ka ndodhur gazetarit Valon Syla.
Kryeministri tha se sulmet ndaj fjalës së lirë nuk duhet të tolerohen, ndërsa teksa i ka uruar shërim të shpejt gazetarit Syla i ka ftuar organet e rendit që sa më parë të zbardhin rastin dhe përgjegjësit të dalin para drejtësisë.
“Sulmi i mbrëmshëm ndaj gazetarit dhe opinionistit Valon Syla është i patolerueshëm dhe i papranueshëm. Mospajtimet me bindjet dhe qëndrimet nuk duhet të jenë shkas për sulme fizike”, u shpreh kryeministri.
Qeveria e Kosovës po shqyrton edhe Projektligjin për zgjedhjet e përgjithshme, ku mes tjerash është futur edhe mundësia e votimit të diasporës nëpër konsullata e ambasada.
Në rënd të ditës për shqyrtim janë 14 pika të ndryshme, duke mos përjashtuar edhe ndonjë që mund të futet gjatë mbajtjes së mbledhjes.