Lionel Messi u rikthye protagonist me PSG-në, duke shënuar golin e radhës, me skuadrën që mori tri pikë në transfertë. Por kjo nuk do të thotë se ai do të qëndrojë në Paris. Rikthimi i mundshëm në Barcelonë këtë verë ka ndezur shumë entuziazëm në mesin e tifozëve.
Rikthimi i tij në “Camp Nou” shihet si shumë i mundshëm për faktin se ylli argjentinas nuk ka pranuar ende që të rinovojë kontratën me Paris Saint-Germain. Megjithatë, sipas “Mundo Deportivo”, pengesa kryesore për rikthimin e Messit është aspekti financiar.
As Barcelona dhe as 35-vjeçari nuk duan të marrin një rrezik që më pas mund të çojë në mos regjistrimin e lojtarit. Kjo kishte ndodhur në gusht të vitit 2021. Dhe, as presidenti i Barçës, Joan Laporta dhe as Messi nuk duan ta përsërisin atë përvojë.
Në fund të shkurtit, Laporta u takua me Jorge Messin, babain e Leos, në Barcelonë. Futbollisti tani shpreson që ai do ta kontaktojë personalisht për të diskutuar një rikthim të mundshëm.
Shtatë herë fituesi i “Topit të Artë” shpreson se Laporta do të ndërmarrë hapin për të folur drejtpërdrejt me të për të rregulluar sadopak raportet mes tyre.
Përshëndetja mes të dyve ishte shumë e ftohtë më 8 gusht 2021, kur u bë e ditur se Messi po largohet. Ata as nuk u përshëndetën më 27 shkurt në Salle Pleyel, ku ata ishin prezent në ceremoninë e më të mirëve të FIFA-s.
Në anën tjetër, stafi i trajnerëve të Barcelonës tashmë po planifikojnë punën e tyre duke pasur parasysh rikthimin e mundshëm të argjentinasit. Messi është në kontakte të shpeshta me Xavin dhe trajneri tashmë i ka thënë sulmuesit se cili do të ishte roli i tij nëse ai rikthehet.
Barcelona thuhet se do t’i ofrojë Messit një kontratë njëvjeçare nëse La Liga miraton lëvizjen. Javë më parë u konfirmua nga zëvendës-presidenti i klubit, Rafa Yuste, se ka kontakte mes palëve, por jo edhe diçka konkrete rreth rikthimit të mundshëm të “pleshtit”.
Edhe Paris Saint-Germaini i ka ofruar fituesit të Kupës së Botës kontratë të re, por që ende nuk është pranuar. Messi me parisienët ka kontratë të vlefshme deri më 30 qershor 2023.
