Me gjuhë fyese ka përfunduar debati mes ministrit të Kulturës, Hajrulla Çeku, me deputetin e LDK-së, Armend Zemaj.
Në Kuvendin e Kosovës ku po mbahet debat për punën dyvjeçare të Qeverisë, Zemaj i është drejtuar Çekut me fjalët “rrugaç, lahper, majmun”.
Çeku paraprakisht e ka quajtur gënjeshtar Zemajn për një deklaratë të tijën.
Ai i ka thënë se duhet t’i vijë turp Zemajt për fjalorin.
Si nisi përplasja
Ka qenë deputeti i LDK-së, Armend Zemaj që në fjalën e tij tha se ministri i Kulturës, Hajrulla Çeku, ka një këshilltar i cili paguhet 5 mijë e 560 euro.
Në seancën e sotme e cila është vazhdim i debatit për punën dyvjeçare të Qeverisë Kurti, Zemaj kërkoi nga Çeku sqarim lidhur me këtë çështje.
“Sipas informatave që kemi, ju e keni paguar një ekspert që juve ju këshillon me pagë 5 mijë e 560 euro, a mund të na tregosh çfarë cilësie ka ky ekspert, për çka?”, pyeti deputeti, njofton Klankosova.tv.
Zemaj po ashtu tha se ministri Çeku ka dhënë më së shumti miliona subvencione në OJQ-të e Prizrenit.
“Besa edhe për OJQ ku keni qenë ju i angazhuar më përpara”, tha Zemaj.
E ministri i Kulturës, Hajrulla Çeku, iu ka përgjigjur deputetit të LDK-së, Armend Zemaj, për çështjen e ekspertit, për të cilin ky i fundit tha se paguhet mbi 5 mijë euro.
Çeku tha në seancë se personi në fjalë nuk është këshilltar, por konsulent profesional që është angazhuar nga administrata dhe nuk është emërim politik.
“Nuk është këshilltar i ministrit, nuk ka kuptim për një këshilltar të paguhet aq shumë, por është konsulent që ofron shërbime të caktuara të cilat e kanë vlerën që e kanë, kontrata është publike, për ato shërbime ai ka thënë që aq kushton”, tha ministri.
Ai po ashtu mohoi se ka subvencionuar më së shumti OJQ-të në Prizren.
“Kjo nuk qëndron, është gënjeshtër, shumica e subvencioneve nuk kanë shkuar në organizatat e Prizrenit”, tha ministri.
Dhe kjo bëri që deputeti Zemaj të mos përmbahet dhe të lëshohet në gjuhë fyese duke iu drejtuar Çekut me fjalët “rrugaç, lahper, majmun”.
Reagon kryeparlamentari
Ndërkohë, kryeparlamentari Glauk Konjufca ua ka tërhequr vërejtjen, ndërsa sqaroi se sipas rregullores fjala e ministrit nuk ishte fyese, pro ajo që përdori deputeti Zemaj nga ulësja e tij.
“Fjala ‘mashtrim’ dhe ‘gënjeshtër’ nuk është fjalor joparlamentar sepse e keni përdorur edhe ju shumë shpesh dhe është përdorur në këtë Kuvend prej kur e mbaj mend unë. Kështu që fjalët tjera janë joparlamentare, ato që po i thotë Zemaj. Nuk e lejoj këtë”, ka thënë Konjufca.
Kujtojmë se ditë më parë edhe një deputet tjetër i LDK-së, Kujtim Shala përdori gjuhë fyese dhe sharje ndaj kryeministrit Albin Kurti.
