Autoriteti kompetent në kuadër të institucionit të Prokurorit të Shtetit ka iniciuar procedurën disiplinore ndaj prokurorit që merrej me rastin e tashmë së ndjerës, Sebahate Morina.
Këtë e ka bërë të ditur Zyra e Kryeprokurorit të Shtetit pas vendimit të Gjykatës Kushtetuese që thotë se institucionet e Kosovës kanë dështuar ta mbrojnë jetën e të ndjerës Sebahate Morina e cila u vra nga bashkëshorti i saj.
“Kryeprokurori i Shtetit ka bërë të ditur se pas vendimit të Gjykatës Kushtetuese lidhur me rastin e të ndjerës Sebahate Morina, autoriteti kompetent në kuadër të institucionit të Prokurorit të Shtetit ka iniciuar procedurën disiplinore ndaj prokurorit të këtij rasti.Për epilogun e kësaj procedure opinioni publik do të njoftohet me kohë”, thuhet në njoftim.
