Në Komisionin për Mbikëqyrjen e Agjencisë së Kosovës për Inteligjencë ka raportuar paraditen e sotme drejtori i Agjencisë së Kosovës për Inteligjencë (AKI), Petrit Ajeti.
Raportin e tij Ajeti e ka bërë të ditur para deputetëve pa praninë e medieve, por disa nga ato që janë raportuar janë bërë të ditur mandej nga kryetarja e Komisionit, Ganimete Musliu.
Ajo tha se janë informuar në detaje nga shefi i AKI-së për gjendjen në veri.
Sipas raporteve të AKI-së dy grupe serbe janë duke u stërvitur në Rashkë të cilat janë rrezik potencial për destabilizimin e veriut të Kosovës.
Këto grupe janë nga e ashtuquajtura Mbrojtja Civile dhe pjesëtarë të Listës Serbe.
“E ashtuquajtura Organizatë e Mbrojtjes Civile në bashkëpunim edhe me Listën Serbe në vazhdim kanë aktivitet në veri të vendit. Pjesëtarët e kësaj organizate po trajnohen në Rashkë për veprime destabilizuese në Kosovë. Atje vazhdon djegia e veturave të qytetarëve serbë me targa RKS. Po ashtu linçimi dhe presoni është rritur ndaj qytetarëve serbë që nuk i binden Listës Serbe. Prandaj si shtet duhet të përgatitemi për çdo provokim të situatës që mos të na zë në befasi. AKI-ja po e kryen punë me sukses dhe e ka përkrahjen e Komisionit për veprime konkrete. Unë flas zyrtarisht si institucion. Është e konfirmuar që dy grupe janë duke u stërvitur në Rashkë e që mund të merren me veriun e Kosovës, ka stërvitje gjuajte me armë, taktizim”, ka thënë ajo para mediave.
“Për këtë janë të informuara edhe institucionet ndërkombëtare”, ka thënë mes tjerash Musliu në një konferencë për media, raporton KosovaNews.
