Ish-gjenerali shqiptar i Divizionit të Kukësit, Kudusi Lame, i cili po merr pjesë në protestën e shqiptarëve në Hagë në mbështetje të ish-krerëve të UÇK-së, ka thënë se nuk janë të gatshëm të pranojnë padrejtësinë vetëm se dikush dëshiron ta kthejë Serbinë në viktimë e shqiptarët që luftuan për çlirim, në kriminelë.
Duke iu drejtuar protestuesve nga diaspora, gjenerali Lame ka pyetur nëse mendon Evropa që progresi dhe zhvillimi arrihen “duke dëmtuar çlirimtarët”.
Ai ka thënë se populli shqiptar sot po lufton për të fituar të drejtën dhe dinjitetin politik dhe juridik në sytë e botës.
“Si të gjithë të tjerët, nuk kemi dëshirë të kemi edhe në kohët moderne frikë se po na vrasin. Sot dua të thërras që të dëgjohemi në të gjitha kontinentet. Nuk mund të durojmë më padrejtësinë vetëm pse të fuqishmin duan të rregullojnë interesat e tyre mbi të drejtat tona. Nuk jam i gatshëm të pranoj padrejtësinë vetëm pse Serbinë dikush ka dëshira ta kthejë në viktimë e shqiptarët që luftuan për t’u çliruar e shpëtuar prej saj, të kthehen në kriminelë. A ndihesh vërtetë e plotësuar duke akuzuar çlirimtarët për krime për të bërë Serbinë viktimë? A i beson vetë këto që po bën? A vërtetë mendon Evropa që progresi dhe zhvillimi arrihen duke dëmtuar çlirimtarët? Unë vij këtu si një ushtar nga fusha e betejës sepse konsideroj që sot kombi shqiptar pikërisht këtu e ka vijën e frontit për të fituar të drejtën dhe dinjitetin politik dhe juridik në sytë e botës”, ka thënë ai.
Protesta e shqiptarëve të diasporës që po zhvillohet pranë Gjykatës Speciale në Hagë, do të vazhdojë deri në orën 13:00.
