Këtë të premte, ministri i Financave, Hekuran Murati ka pritur në takim drejtorin ekzekutiv të Fondit Monetar Ndërkombëtar (FMN), Daniel Palotai.
“Ministri i Financave, Punës dhe Transfereve z. Hekuran Murati ka pritur sot në takim Drejtorin Ekzekutiv të Fondit Monetar Ndërkombëtar, z. Daniel Palotai dhe Shefin e Misionit të FMN-së për Kosovë, z. Gabriel Di Bella. Me këtë takim u shënua përmbyllja e misionit të ekipit të FMN-së, të cilët qëndruar në Kosovë përgjatë muajit mars”, njofton Ministria e Financave.
Në këtë takim është diskutuar lidhur me zhvillimet e fundit sa i përket fushëveprimtarisë së Ministrisë së Financave, Punës dhe Transfereve, si dhe për mundësitë për thellimin e bashkëpunimit.
Ministri Murati ka falënderuar drejtorin ekzekutiv të FMN-së dhe ekipin për mbështetjen e ofruar deri më tani, ndërsa të dy palët u shprehën të gatshme për të thelluar bashkëpunimin edhe në të ardhmen në fusha me interes të veçantë për Kosovën.
