Policia e Kosovës ka njoftuar se ka nisur hetimet pasi një person në Leposaviq ka raportuar se dy të dyshuar e kanë sulmuar fizikisht dhe me armë zjarri.
Sipas njoftimit, viktima ka pësuar lëndime në kokë dhe në këmbë, ndërsa është dërguar për trajtim mjekësor.
“Viktima kosovar, me lëndime në kokë dhe këmbë, është paraqitur në stacionin policor Leposaviq dhe ka deklaruar se është sulmuar fizikisht dhe me armë zjarri nga dy persona të dyshuar. Viktima është dërguar në trajtim mjekësor, përderisa në vendin e ngjarjes kanë dalë njësitë përkatëse policore”, thuhet në njoftim.
Bëhet e ditur se rasti po trajtohet si “vrasje në tentativë”, ndërsa po hetohet nga njësitet kompetente.
