Policia e Kosovës ka dhënë detaje të reja lidhur me vrasjen e një personi dhe plagosjen e dy të tjerëve që ndodhi dje në lagjen “Arbëria” në Prishtinë.
Policia përmes raportit 24 orësh ka thënë se rasti ka ndodhur dje rreth orës 13:21 në rrugën “Ahmet Krasniqi”.
Sipas policisë dy të dyshuar meshkuj kosovarë dyshohet se kanë shtënë me armë në drejtim të viktimës mashkull kosovar i cili është qëlluar dhe ka ndërruar jetë.
“Në vendin e ngjarjes kanë dalë të gjitha njësitë përkatëse si dhe mjeku i cili ka konstatuar vdekjen e viktimës. Po ashtu edhe dy të dyshuarit janë të lënduar dhe janë dërguar në QKUK për tretman mjekësor”, thuhet në raport.
Me vendim të prokurorit trupi i pa jetë i viktimës është dërguar në IML për obduksion, ndërsa dy të dyshuarit janë dërguar në mbajtje për 48 orë.
“Gjatë veprimeve hetimore është intervistuar edhe një i dyshuar i cili më pas është liruar, është sekuestruar edhe: një revole me një karikator dhe 11 fishekë, një gëzhojë dhe një thikë. Rasti vazhdon të hetohet nga njësitet kompetente policore”, njofton policia.
Ndryshe, lidhur me këtë rast Prokuroria Themelore e Prishtinës ka bërë të ditur për “Betimi për Drejtësi se janë ndaluar dy të dyshuar.
