Deputeti i LDK-së, Driton Selmanaj, e ka kritikuar kryeministrin e Kosovës, Albin Kurti, për pranimin e planit evropian. Sipas tij kjo marrëveshje nuk e ka referencë Kushtetutën e Kosovës.
Selmanajt në Debat Plus, i është kundërpërgjigjur, analisti Imer Mushkolaj, i cili tha se njëjtë kishte vepruar edhe LDK me ish-kryeministrin Avdullah Hoti, në Washington, ku sipas tij kishte nënshkruar marrëveshje pa iu referuar Kushtetutës.
“LDK dhe Hoti, keni qenë në Uashington, e keni nënshkruar një marrëveshje që nuk ka referencë në Kushtetutë. Gjema marrëveshjen, e kam përpara, nëse gjeni referencë në Kushtetutë unë tërhiqna. Për referencë nuk e keni asnjë, vazhdimisht marrëveshjet prej secilës qeveri, s’kanë pasë referenca në kushtetutë. Kemi fol për situatë neutrale për normalizim të marrëdhënieve”, ka thënë ai.
Tutje, Mushkolaj ka thënë se nuk beson se LDK dhe PDK, janë të sinqertë kur thonë se e kundërshtojnë marrëveshjen, pasi sipas tij këto dy parti e kanë nënshkruar Asociacionin së pari në 2013 dhe pastaj në 2015.
“As LDK as PDK, që janë nënshkrues të 2013-tës, nuk i marr seriozisht në sinqetitetin e tyre. Vetë LDK, e ka nënshkru parimet jokushtetuese, gjykata ka thënë unë jo. Ende nuk e di qëndrimin e LDK-së, pavarësisht sqarimeve tuaja, pse është e papranueshme kjo marrëveshje. E kemi dëgju Adbixhikun, që ka thënë se nëse vjen në kuvend nuke voton, nuk e besoj, nëse marrëveshja shkon në kuvend ajo do ta votojë, jam i sigurtë”, ka thënë ai.
Selmanaj, në emision gjithashtu ka theksuar se partia e tij nuk ka ndryshuar qëndrim për çështjen e Asociacionit të Komunave me Shumicë Serbe dhe se nuk janë kundër formimit të Asociacionit.
“Nuk është se LDK-ja ka ndërruar qëndrimin për çështjen e Asociacionit. LDK-ja nuk është kundër Asociacionit, LDK-ja është që çështja e dialogut të jetë çështje prioritare në raport me agjendën tonë të fuqizimit të subjektivitetit tonë ndërkombëtar dhe respektimin e marrëveshjeve të gjithave që i kanë nënshkruar Qeveritë e Kosovës”, ka deklaruar ai.
Po ashtu, ai ka thënë se partia e tij ka shumë pikëpyetje në lidhje me propozimin e Bashkimit Evropian për çështjen e dialogut ndërmjet Kosovës dhe Serbisë./Rtv Dukagjini/
