Numri i gjobave në komunikacion ka shënuar rritje të madhe gjatë vitit 2022 në krahasim me vitin 2021. Të dhënat e policisë rrugore tregojnë se gjatë vitit të kaluar ka shqiptuar 645 485 tiketa kundërvajtëse që i bie mbi 162 mijë më shumë se vitin 2021 kur ishin gjobitur 483 477 qytetarë.
Nëse mesatarja e gjobave ka vlerën 20 euro atëherë i bie se vetëm nga dënimet gjatë vitit të kaluar janë mbledhur rreth 13 milionë euro të cilat kanë shkuar në buxhetin e konsoliduar të shtetit.
Numri i madh i gjobave ka ndikuar edhe në uljen e numrit të aksidenteve në trafik. Zyrtarët e policisë rrugore por edhe ekspertët e komunikacionit kanë thënë se sa më shumë prezencë të policisë në rrugë dhe ndëshkim të atyre që thyejnë rregullat në trafik, ka më pak aksidente.
Statistikat e policisë të siguruara nga IndeksOnline, tregojnë se gjatë janarit dhe shkurtit të këtij viti, në gjithë territorin e vendit janë shqiptuar 97 076 gjoba në komunikacion.
Sot në raportin 24 orësh të policisë figurojnë 2 061 gjoba të shqiptuara në shtatë rajonet e Kosovës.
