Pas më shumë se një orë ndalimi policia serbe i ka lejuar të futen në Serbi Kryetarin e Gjilanit, Alban Hyseni dhe deputetin i Kuvendit të Kosovës Luan Aliun.
Në një prononcim për KosovaNews përmes telefonit deputeti Luan Aliu ka thënë se ata janë ndaluar dhe mbajtur për më shumë se një orë nga policia serbe pa kurfar arsye.
“Po ne sot së bashku me kryetarin e Gjilanit Alban Hysenin ishim duke shkuar për një vizitë private për t’i shprehur ngushëllime kryetarit të Bujanovcit me rastin e vdekjes së vllaut të tij dhe në piken Kufitare Dheu i Bardhë pasi kaluam kufirin me Kosovën na ndalën Policia Serbe dhe na mbajtën për më shumë se një orë duke na i marrë pasaportat. Unë kam zbrit nga makina dhe u kam kërkuar arsyejen se pse po na mbajnë kaq gjatë mirëpo ata nuk kanë pranuar të flasin me ne duke mos na dhënë asnjë arsye”
Deputeti Ali ka thënë se duke e parë që po mbahen padrejtësisht nga policia serbe ka lajmëruar autoritetet në Prishtinë dhe Zyren ndërlidhëse të Kosovës në Beograd.
“Po ne kur e kuptuam se policia serbe po na maltreton pa ndonjë arsye, e kam lajmëruar Ministrinë e Punëve të Brendshme të Republikës së Kosovës dhe në koordinim me ta jam lidhur me Zyren ndërlidhëse të Kosovës në Beograd dhe i kam lajmëruar në detaje për rastin dhe ata më thanë se do të merren menjëherë me këtë çështje duke i njoftuar edhe institucionet ndërkombëtare. Pastaj pas një kohe të shkurtë policia serbe na i dha pasaportat dhe tash për momentin jemi rrugës për në Bujanovc. Ndalimi i jonë është një provokim dhe maltretim i panevojshëm nga ana e Serbisë vetëm për t’i mbajtur raportet e tensionuar mes dy vendeve tona” ka thënë Aliu për KosovaNews.
