Një aksident i rëndë komunikacioni ka ndodhur mbrëmjen e së mërkurës në rrugën Ferizaj – Shtime, ku si pasojë katër persona kanë vdekur, ndërsa dy të tjerë janë të lënduar rëndë dhe po trajtohen në Qendrën Klinike dhe Universitare të Kosovës (QKUK).
Policia e Kosovës sot ka dhënë disa detaje shtesë se si ka ardhur deri te aksidenti fatal.
Sipas Policisë, deri te aksidenti dyshohet se ka ardhur kur drejtuesi i njërës nga veturat për arsye deri më tani të pa njohura, humb kontrollin mbi veturë dhe godet dy veturat tjera të cilat ishin duke lëvizur në drejtim të kundërt.
“Ka ndodhur aksident trafiku në mes të tri veturave me targa vendore, deri te aksidenti dyshohet se ka ardhur kur drejtuesi i njërës nga veturat për arsye deri më tani të pa njohura, humb kontrollin mbi veturë dhe godet dy veturat tjera të cilat ishin duke lëvizur në drejtim të kundërt. Nga ekipi mjekësor në vendin e ngjarjes është konstatuar se tre viktima meshkuj kosovarë janë pa shenja jete, ndërsa tre të lënduar tjerë janë dërguar në emergjencën e Ferizajt, ku më pas ka ndërruar jetë edhe viktima e katërt mashkull kosovar ndërsa dy të lënduarit e tjerë janë dërguar në QKUK Prishtinë për tretman të mëtutjeshëm mjekësor. Në vendin e ngjarjes ka dalë edhe prokurori i shtetit”, thuhet në raportin e sotëm të Policisë së Kosovës.
Deklaratat e dhëna mbrëmë për aksidentin i lexoni në linkun më poshtë:
