Qeveria e Kosovës në mbledhjen e sotme ka miratuar shqyrtimin e propozim-vendimit për themelimin e strukturave për hartimin e strategjisë kundër korrupsionit.
Kryeministri Albin Kurti tha se mandatin e kanë filluar duke luftuar korrupsionin dhe krimin e organizuar.
“Mandatin tonë qeverisës e kemi filluar duke qëndruar afër me qytetarët dhe duke luftuar korrupsionin dhe krimin e organizuar përmes politikave të drejta e të guximshme të qeverisjes me duar të pastra. Rezultatet tona i ka konfirmuar edhe “Transparence internacional” me indeksin e perceptimit të korrupsionit ku Republika e Kosovës ka shënuar progres për 20 vende në dy vitet e fundit. Me të njëjtin ritëm do të vazhdojmë”, tha Kurti.
Mes tjerash kryeministri Albin Kurti ka prezantuar edhe përbërjen e komisionit që do ta udhëheq hartimin e kësaj strategjie.
Për këtë Kurti ka angazhuar ministrin e Financave, Hekuran Murati, ministren e Drejtësisë Albulena Haxhiun, ministrin e Brendshëm, Xhelal Sveçla dhe ministren e Ekonomisë, Artane Rizvanolli.
“Ky komision do të udhëhiqet nga ministri i Financave, Hekuran Murati me ministrat anëtarë: Albulena Haxhiu, Xhelal Sveçla dhe Artane Rizvanolli. Bashkë do të hartojnë planin e veprimit deri në dhjetor ndërsa në qeveri do të votohet në fund të vitit”, tha Kurti.
