Pas dy javësh qëndrimi në Turqi, pak minuta më parë në Aeroportin e Prishtinës “Adem Jashari” kanë arritur ushtarët e Forcës së Sigurisë së Kosovës. Në aeroport ata janë pritur nga kryeministri i Kosovës, Albin Kurti, dhe zyrtarë tjerë të kabinetit qeveritar.
Të njëjtit janë kthyer pas shërbimit që kanë kryer në Turqi, për t’u dalë në ndihmë në operacionet e kërkim –shpëtimit të gjithë atyre që po kërkonin familjarët e mbetur nën rrënoja.
Kontingjenti i Forcës së Sigurisë së Kosovës të cilët udhëtuan drejt Turqisë kanë arritur që të shpëtojnë jetën e disa personave, duke arritur që t’i nxjerrin nga rrënojat e dëmtuara si pasojë e tërmetit të fuqishëm që kishte goditur një pjesë të Turqisë dhe Sirinë të hënën e para dy jave.
Si shkak i këtyre tërmeteve kanë humbur jetën mbi 40 mijë persona, ndërsa shumë dëme janë shkaktuar në ndërtimet e rrënuara nga lëkundjet e tokës.
Turqisë përgjatë kësaj kohe i dolën në ndihmë shtete të shumta, duke dërguar ushtarë, mjekë, por edhe para të shumta në mënyrë që të ndihmojnë ata që kanë nevojë.
