Ministri i Mbrojtjes së Kosovës, Armend Mehaj e ka pritur sot në takim ministrin e Mbrojtjes në detyrë të Finlandës , Mikko Savola, me të cilin kanë diskutuar rreth situatës aktuale gjeopolitike, impaktit të agresionit rus në Ukrainë, si dhe situatën e sigurisë në Kosovë, bashkëpunimin me KFOR-in e po ashtu për synimet e përbashkëta të të dyja shteteve për anëtarësim në NATO.
Ministri Mehaj tha se temë diskutimi ishte edhe bashkëpunimi në fushën e sigurisë, trajnimet e përbashkëta dimërore ndërmjet dy forcave, dhe shkëmbimi i përvojës së Ushtrisë Finlandeze sa i përket konceptit të rezervës vullnetare, që së shpejti do të jetë formë e shërbimit edhe në ushtrinë e Kosovës.
“Ministrin në detyrë e njoftova për zhvillimin e FSK-së, implementimin e Planit të Përgjithshëm të Tranzicionit, si dhe gatishmërinë tonë për të ofruar gjithë ndihmën e nevojshme në misionet e NATO-s, ashtu siç kemi vepruar duke asistuar në operacionin për evakuimin e refugjatëve afgan, si dhe ofrimin e trajnimeve për ushtarakët ukrainas”, ka thënë ai.
Mehaj tha se ka ritheksuar edhe një herë se synimi i Kosovës është që të ofrojë kontributin në sigurinë e përgjithshme, andaj anëtarësimi në NATO, është objektivi më i rëndësishëm.
Në anën tjetër ministri në detyrë Savola, vlerësoi lartë bashkëpunimin e FSK-së me KFOR-in dhe shprehu gatishmërinë për bashkëpunimin në një situatë kur synimi për anëtarësim në NATO, dhe ruajtja e stabilitetit e paqes mbeten përpjekjet kyçe të angazhimit ditor.
