Kryeministri Albin Kurti gjatë seancës së sotme parlamentare iu është përgjigjur pyetjeve të deputetëve, me ç’rast ka folur për dialogun e mes Kosovës dhe Serbisë që po e ndërmjetëson BE she ShBA.
Lidhur me planin franko-gjerman, Kurti ka thënë se aty parashihet njohja de facto.
“Ky propozim parasheh normalizim të marrëdhënieve ndërkombëtare ku Republika e Kosovës dhe ajo e Serbisë njohin njëra tjetrën në formën defakto. Një gjë e tillë duket e qartë në tekstin e marrëveshjes por një gjë e tillë është premtuar edhe nga shtetet e emisarëve që e kanë propozuar marrëveshjen si dhe vet bashkimi Evropian”, tha ai.
Kurti thotë se marrëveshja i vendos Kosovën dhe Serbinë si dy entitete të barabarta.
“Serbia nuk do të mund ta kundërshtojë anëtarësimin e Kosovës në organizata ndërkombëtare”.
I pari i qeverisë thotë se të gjitha këto janë parime fundamentale që shtetet e pavarura ua njohin njëra-tjetrës.
Ai thotë se procesi i dialogut është në drejtimin e duhur për dallim nga e kaluara.
“Njohje de jure e Serbisë nuk është në mënyrë eksplicite e shkruar në marrëveshje, por është pjesë sekuenciale e planit që do të arrihet në ndërkohë”, deklaroi Kurti.
Kurti thotë se Serbia nuk do të mund të anëtarësohet në Bashkimin Evropian pa njohur Kosovën, e që sipas tij një gjë e tillë nuk ka qenë kusht më parë.
