Zëvendëskryeministrja dhe ministrja në detyrë e Drejtësisë, Donika Gërvalla-Schwarz, ka përkujtuar 36-vjetorin e Deklaratës Kushtetuese të 2 Korrikut, duke e cilësuar atë si aktin historik që hodhi gurin e parë themeltar të Republikës së Kosovës.
Përmes një postimi, Gërvalla rikujtoi se më 2 korrik 1990, delegatët e Kuvendit të Kosovës, në kushte të jashtëzakonshme dhe nën kërcënimin e armëve të njësive speciale të policisë, shpallën vullnetin e popullit të Kosovës përmes Deklaratës Kushtetuese, duke e shpallur Kosovën njësi të barabartë në federatën/konfederatën jugosllave.
Sipas saj, ky akt shënoi gurin e parë të shtetësisë moderne të Kosovës dhe e orientoi vendin në mënyrë të pakthyeshme drejt Republikës.
Gërvalla theksoi se Deklarata e 2 Korrikut u bë boshti politik dhe juridik mbi të cilin u ndërtuan institucionet e Republikës, u organizua rezistenca civile, u forcua mobilizimi kombëtar dhe u mbajt gjallë aspirata e popullit për liri, pavarësi dhe demokraci.
Në mesazhin e saj, ajo shtoi se Republika e Kosovës sot është dëshmia më e fuqishme se vizioni i delegatëve të 2 Korrikut ishte i drejtë, i guximshëm dhe historikisht i pandalshëm.
“Nderimi më i mirë për delegatët e asaj dite është forcimi i vazhdueshëm i shtetit tonë, mbrojtja e demokracisë dhe avancimi i Republikës për të cilën ata morën përsipër përgjegjësi historike në një nga momentet më vendimtare të historisë sonë kombëtare”, ka shkruar Gërvalla.
Postimi i Plotë:
36 vjet nga Deklarata Kushtetuese e 2 Korrikut, akti historik që hodhi gurin e parë themeltar të Republikës së Kosovës
Me 2 Korrik të vitit 1990, delegatët e Kuvendit të Kosovës, në kushte të jashtëzakonshme, nën kërcënimin e armëve të njësive speciale të policisë, duke mos u lejuar të futen në objektin e Kuvendit të Kosovës, shprehën vullnetin e popullit të Kosovës përmes një deklarate me të cilën Kosova shpallet njësi e barabartë në federatën/konfederatën jugosllave. Në këtë mënyrë, delegatët guximtarë të asaj kohe hodhën gurin e parë themeltar të shtetësisë sonë moderne dhe e orientuan në mënyrë të pakthyeshme Kosovën drejt Republikës.
Deklarata e 2 Korrikut u bë boshti politik e juridik rreth të cilit u ndërtuan institucionet e Republikës, u organizua rezistenca civile, u forcua mobilizimi kombëtar dhe u mbajt gjallë aspirata e pandalshme e popullit tonë për liri, pavarësi e demokraci.
Sot, Republika e Kosovës qëndron si dëshmia më e fuqishme se vizioni i 2 Korrikut ishte i drejtë, i guximshëm dhe historikisht i pandalshëm. Nderimi më i mirë për delegatët e asaj dite është forcimi i vazhdueshëm i shtetit tonë, mbrojtja e demokracisë dhe avancimi i Republikës për të cilën ata morën përsipër përgjegjësi historike në një nga momentet më vendimtare të historisë sonë kombëtare.
