Analisti Ilir Mirena ka publikuar në rrjetet sociale një fotografi të kryeministrit në detyrë, Albin Kurti, të shkrepur në një ditë zie, gjatë përkujtimit të masakrës së familjes së deputetes së Lëvizjes Vetëvendosje, Saranda Bogujevci.
Përkundër kontekstit të dhimbshëm në të cilin është realizuar fotografia, Mirena e ka përdorur atë për t’u tallur me paraqitjen e Kurtit, duke shkruar:
> “Duket kështu si gjynah, që veç përshesh han, ama veç vjet në zyrën e tij i ka rras nja 112 mijë euro dreka e darka, e kaftjalla… 😁”
Përdorimi i kësaj fotografie për këtë qëllim, ka nxitur reagimin e ashpër të deputetes Saranda Bogujevci, e cila në atë ditë përkujtonte njërën nga plagët më të rënda të historisë së saj personale dhe të Kosovës – masakrën në të cilën u vra pjesa më e madhe e familjes së saj.
Bogujevci ka reaguar publikisht duke e quajtur postimin e Mirenës të paturpshëm dhe vetë autorin si “mjeran”:
> “Mjeran, Ilir Mirena. Kjo foto është bërë në ditën e përkujtimit të masakrës së familjes sime, në një ditë kur asnjëri nga shefat e tu nuk e ka hapur derën – as për ne, as për të tjerët.
Mjerim që jetojmë dhe marrim frymë në të njëjtin ajër me mjeranë si ti.
Nuk keni as kufij, as turp për asgjë. Keni mbetur veç të mjerë.”
