Qeveria në detyrë e Republikës së Kosovës ka mbajtur sot mbledhjen e saj të 259-të në formë elektronike, ku ka miratuar kërkesën e Ministrisë së Mbrojtjes për dërgimin e një kontingjenti të Forcës së Sigurisë së Kosovës (FSK) në një operacion humanitar në Shqipëri, transmeton KosovaNews.
Sipas vendimit, kontingjenti i FSK-së do të marrë pjesë në një operacion të kërkim-shpëtimit në zonën “Qafa e Burrelit”, në Bashkinë Klos. Mjetet financiare për realizimin e këtij operacioni do të sigurohen nga Buxheti i Republikës së Kosovës.
Kjo ndërhyrje bëhet në kuadër të bashkëpunimit strategjik ndërmjet Kosovës dhe Shqipërisë, si dhe angazhimit të FSK-së për të kontribuar në operacione humanitare jashtë vendit, në përputhje me planifikimet strategjike të Ministrisë së Mbrojtjes.
