Ministri në detyrë i Bujqësisë, Faton Peci ka njoftuar se më 06.05.2025, janë liruar zyrat e Agjencisë së Pyjeve të Kosovës në Leposaviq të cilat sipas ministrit ishin të uzurpuara nga strukturat ilegale dhe kriminale të Serbisë.
Këto hapësira sipas ministrit në detyrë, janë rikthyer nën menaxhimin e Agjencisë së Pyjeve të Kosovës.
“Në kuadër të shtrirjes së ligjshmërisë dhe sovranitetit në gjithë territorin e Republikës së Kosovës, sot janë ndërmarrë veprimet për lirimin e zyrave të Agjencisë së Pyjeve të Kosovës që ishin të uzurpuara nga strukturat ilegale dhe kriminale të Serbisë që kanë vepruar në Kosovë”- shkroi ai në rrjete sociale.
Postimi i Plotë:
Në veri me vepra!
Në kuadër të shtrirjes së ligjshmërisë dhe sovranitetit në gjithë territorin e Republikës së Kosovës, sot janë ndërmarrë veprimet për lirimin e zyrave të Agjencisë së Pyjeve të Kosovës që ishin të uzurpuara nga strukturat ilegale dhe kriminale të Serbisë që kanë vepruar në Kosovë.Këto hapësira janë rikthyer nën menaxhimin e Agjencisë së Pyjeve të Kosovës.
Ky veprim është i domosdoshëm për të siguruar funksionimin e rregullt të stafit të APK-së në përmbushjen e objektivave strategjike dhe ligjore për një menaxhim të duhur dhe parandalimin e prerjeve ilegale në rajonin e Leposaviqit dhe për realizimin e detyrave zyrtare në përputhje me mandatin ligjor të institucionit tonë.
