Udhëheqësi i Shtetit Islamik (ISIS) në Irak dhe Siri është vrarë në Irak gjatë një operacioni të kryer nga anëtarë të Shërbimit Informativ Kombëtar të Irakut me forcat e koalicionit të udhëhequr nga SHBA, njoftuan Komanda Qendrore e SHBA-së (CENTCOM) dhe kryeministri irakian.
“Irakianët vazhdojnë të korrin fitore mbresëlënëse mbi forcat e errësirës dhe terrorizmit”, tha kryeministri Mohammed Shia al-Sudani.
Abdallah Maki Mosleh al-Rifai, i njohur gjithashtu si Abu Khadija, ishte “zëvendëskalifi” i grupit militant dhe u përshkrua si “një nga terroristët më të rrezikshëm në Irak”.
Lajmin për vrasjen e tij e bëri të ditur vetë Donald Trump në Truth Social: “Sot, lideri i arratisur i ISIS në Irak u vra. Luftëtarët tanë trima punuan pa u lodhur për ta gjuajtur atë në bashkëpunim me qeverinë irakiane dhe qeverinë rajonale kurde. Jeta e tij e mjerë ka përfunduar, së bashku me një tjetër anëtar të ISIS. PAQE PËRMES FUQISË!”
CENTCOM njoftoi se Abu Khadija u vra në një “sulm ajror preciz” në provincën Al Anbar të Irakut, në një operacion që përfshinte forcat e inteligjencës irakiane dhe forcat amerikane të CENTCOM.
Një tjetër operativ i ISIS-it u vra gjithashtu në sulm, përcjell Telegrafi.
Bëhet e ditur se është publikuar edhe një video e sulmit ajror.
CENTCOM Forces Kill ISIS Chief of Global Operations Who Also Served as ISIS #2
— U.S. Central Command (@CENTCOM) March 15, 2025
On March 13, U.S. Central Command forces, in cooperation with Iraqi Intelligence and Security Forces, conducted a precision airstrike in Al Anbar Province, Iraq, that killed the Global ISIS #2 leader,… pic.twitter.com/rWeEoUY7Lw
Identiteti i Abu Khadija u konfirmua përmes testit të ADN-së, bazuar në mostrat e mbledhura gjatë një bastisjeje të mëparshme nga e cila ai arriti të arratisej.
“Abu Khadija ishte një nga anëtarët më të rëndësishëm të ISIS në të gjithë organizatën globale”, tha gjenerali Michael Erik Kurilla, komandant i CENTCOM.
“Ne do të vazhdojmë të eliminojmë terroristët dhe të përçajmë organizatat e tyre që kërcënojnë atdheun tonë dhe personelin e SHBA-së, aleatët dhe partnerët në rajon dhe më gjerë”, shtoi ai.
Ndryshe, njoftimi për vrasjen e liderit të ISIS erdhi në të njëjtën ditë kur kryediplomati i Sirisë vizitoi Irakun për herë të parë, me të dy vendet që u zotuan të luftojnë së bashku Shtetin Islamik.
