Më datë 05.01.2026, në Komisariatin e Policisë Has, familjarët e një shtetasi të mitur, 14 vjeç, banues në Has, kanë bërë kallëzim se i mituri është larguar nga banesa pasi ka marrë pa leje automjetin e babait të tij, shtetasit Dirtan Dauti.
Sipas të dhënave paraprake, i mituri, Marigleni, ka furnizuar automjetin me 79 euro karburant (benzinë) në një pikë karburanti “Petrol” në dalje të qytetit të Pejës, në drejtim të Prishtinës.
Babai i 14-vjeçarit ka bërë apel publik për ndihmë, duke kërkuar bashkëpunimin e Policisë së Shqipërisë dhe Policisë së Kosovës për gjetjen e djalit.
Si rezultat, shërbimet e Policisë kanë shpallur në kërkim të miturin dhe po vijojnë kontrollet intensive për lokalizimin dhe gjetjen e tij. Autoritetet janë në komunikim të vazhdueshëm me familjarët.
Materialet proceduriale janë referuar pranë Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme ligjore.
Policia u bën thirrje qytetarëve që, nëse kanë informacion që mund të ndihmojë në gjetjen e të miturit, të njoftojnë menjëherë organet policore.
