Në prag të Asamblesë së Përgjithshme të Kombeve të Bashkuara, tre shtete të tjera – Kanadaja, Australia dhe Britania e Madhe – kanë shpallur zyrtarisht njohjen e shtetit të Palestinës, shkruan KosovaNews.
Kanadaja ishte e para që dha lajmin. Kryeministri Mark Carney njoftoi se vendi i tij nga sot njeh Palestinën si shtet të pavarur. “Kanadaja njeh shtetin e Palestinës dhe ofron partneritet për të ndërtuar një të ardhme paqësore si për Palestinën, ashtu edhe për Izraelin,” deklaroi ai.
Australia bëri njoftimin menjëherë pas Kanadasë. Kryeministri Anthony Albanese kritikoi qeverinë izraelite për, siç tha ai, përpjekjet sistematike për të penguar formimin e shtetit palestinez. Ai theksoi se “Hamas nuk duhet të ketë asnjë rol në Palestinë” dhe shtoi se njohja nga Australia, së bashku me Kanadanë dhe Britaninë, është pjesë e përpjekjeve ndërkombëtare për një zgjidhje me dy shtete.
Britania e Madhe u bashkua gjithashtu me këtë hap. Kryeministri Keir Starmer, duke njoftuar njohjen e Palestinës, paralajmëroi se ndaj Hamasit do të zbatohen sanksione të reja. “Hamas nuk mund të ketë rol në qeverisje apo siguri. U kam dhënë udhëzime që të ndërmerren masa shtesë kundër anëtarëve të tij,” tha ai. Starmer shtoi se “shpresa për një zgjidhje me dy shtete po zbehet, por nuk mund të lejojmë të shuhet.”
Sa vende e kanë njohur Palestinën?
Që nga shpallja e pavarësisë më 15 nëntor 1988, shtetin e Palestinës e kanë njohur 147 vende anëtare të OKB-së, mes tyre Kina dhe Rusia. Me shtimin e Kanadasë, Australisë dhe Britanisë së Madhe, numri arrin në 150 vende.
Turqia ishte ndër vendet e para që njohu Palestinën në vitin 1988, ndërsa vitin e fundit këtë vendim e morën edhe Norvegjia, Spanja, Sllovenia dhe Irlanda.
Çfarë nënkupton “dy shtete”?
Zgjidhja me dy shtete parasheh krijimin e një shteti palestinez me kryeqytet Jerusalemin Lindor, në territorin e Bregut Perëndimor dhe Rripit të Gazës, brenda kufijve të përcaktuar para luftës arabo-izraelite të vitit 1967. Por Izraeli kundërshton ashpër një plan të tillë./KosovaNews/
Lexo po ashtu:
