Vasfije Krasniqi-Goodman, e mbijetuar e dhunës seksuale gjatë luftës në Kosovë, është përfshirë në projektin “Të flasim për dhunimin” të aktivistes dhe fotografes Jadwiga Bronte, i publikuar në revistën prestigjioze botërore “Vogue”.
Ky projekt përmban fotografi të më shumë se 250 grave nga e gjithë bota që kanë përjetuar dhunë seksuale.
Sipas përshkrimit të artikullit, “fotografja dhe aktivistja Jadwiga Bronte ka mbledhur mbi 250 portrete dhe dëshmi personale të të mbijetuarave të dhunës seksuale në nivel global, duke sfiduar anonimitetin që zakonisht i shoqëron këto histori”.
Vasfije Krasniqi-Goodman ishte ndër gratë e para në Kosovë që dolën publikisht si të mbijetuara të dhunës seksuale gjatë luftës së Kosovës.
Sipas raporteve të institucioneve vendore, rreth 20 mijë persona janë dhunuar seksualisht gjatë konfliktit të fundit në Kosovë.
Që nga viti 2014 ekziston ligji që njeh statusin e këtyre viktimave, por deri tani ky status u është njohur vetëm mbi 2 mijë personave.
Ndërkaq, qeveria në detyrë e Kosovës më 14 prill vendosi të shtyjë afatin për aplikimin për njohjen e statusit të personave të dhunuar gjatë luftës deri në maj të vitit 2027.
