Qeveria e ka formuar Komisionin Pranues për pozitën e Drejtorit të Përgjithshëm të Aviacionit Civil, pjesë të së cilit e ka bërë edhe zyrtaren të cilën disa kandidatë për drejtorë i kërkuan AAC-së ta përjashtojë. Kandidatët pretendojnë se ka konflikt interesi dhe për këtë janë ankuar edhe në Qeveri, por nuk kanë marrë përgjigje. E njëjta zyrtare, edhe në konkursin e kaluar ka bërë vlerësimin e kandidatëve, gjatë të cilit proces ishin futur në listë të ngushtë kandidatë pa përmbushur kriteret
Qeveria e ka bërë pjesë të komisionit pranues, të konkursit për drejtor të Përgjithshëm të Aviacionit Civil, zyrtaren që, tre kandidatë për pozitën e drejtorit, kishin kërkuar të përjashtohej.
Kandidatët, Arianit Islami, Besnike Ukmata e Lendita Berisha, me pretendimet për konflikt interesi, i kanë kërkuar AAC-së para se të shpallej lista e ngushtë e kandidatëve, që ta përjashtojë nga procedura administrative e rekrutimit shefen e burimeve njerëzore, Safete Selmanin.
Por, trajtimin e kërkesës për përjashtimin e Selmanit, ushtruesi i detyrës së Drejtorit të AAC-së, Burim Dinarama e ka konsideruar jashtë kompetencave të tij. E ka thënë këtë në një përgjigje që ua kishte dërguar kandidatëve.
“Drejtori i AAC-së mund të jetë vetë kandidat, prandaj çdo veprim dhe përfshirje në këtë proces do të konsiderohej ndërhyrje dhe do të përbënte një konflikt interesi. Rrjedhimisht, drejtori i Përgjithshëm nuk ka as përgjegjësi dhe as të drejtë të ndërhyjë në këtë çështje”, thuhet në email.
Për fazën e vlerësimit paraprak, aplikacionet e kandidatëve i ka verifikuar pikërisht Selmani.
Në emailin e tij drejtuar kandidatëve, drejtori u kishte thënë se Qeveria është përgjegjëse për fazën e mëtejshme.
KOHA e ka pyetur ushtruesin e detyrës së Drejtorit të AAC-së, Burim Dinaramën nëse i ka adresuar kërkesat e kandidatëve në Qeveri, por ai nuk ka kthyer përgjigje.
Por, përveç AAC-së, kandidatët e kanë njoftuar edhe Zyrën e Kryeministrit, për konfliktin e interesit që pretendojnë se ekziston mes tyre e Selmanit.
Pa iu kthyer ndonjë përgjigje atyre Zyra e Kryeministrit, në mbledhjen elektronike Qeveria e bëri Selmanin pjesë të Komisionit shtetëror për vlerësimin profesional të kandidatëve.
Tre kandidatët kanë insistuar se pjesëmarrja e saj në komision përbën konflikt interesi meqë pretendojnë se brenda një procedure rekrutimi, Selmani i kishte vlerësuar aplikacionin e tyre njëherë të suksesshme e njëherë të pasuksesshme. Ata kanë theksuar se me të kanë qenë të përfshirë në padi e kallëzime penale kundër njëri-tjetrit. Për të ankohen se u ka administruar edhe informacione të gabuara në CV-të e tyre.
Por Safete Selmani nuk i ka komentuar pretendimet e kandidatëve. Ajo ka thënë se për këtë është përgjigjur drejtori Dinarama në emailin drejtuar kandidatëve.
“Drejtori i përgjithshëm i është përgjigjur parashtruesve të kërkesës dhe institucionit që ka iniciuar konkursin”, ka thënë Selmani.
Në rastin e njërit prej kandidatëve, gjatë zhvillimit të konkursit të kaluar për drejtor, Agjencia për Parandalimin e Korrupsionit ka konstatuar se situata mund të jetë rrethanë për përjashtimin e Selmanit, porse kishte rekomanduar që AAC-ja ta vlerësojë këtë para se të vazhdojë procedurat.
Lidhur me këtë, në një opinion ligjor të Zyrës së Kryeministrit që është marrë atëkohë, është vlerësuar se vendimi i Komisionit të Pranimit për rekrutimin e Drejtorit të AAC-së duhej të ndryshohej me anëtarë të rinj.
Kandidatët e kanë dërguar çështjen edhe në Këshillin e Pavarur Mbikëqyrës të Shërbimit Civil (KPMSHC).
Safete Selmani ka bërë vlerësimin paraprak të kandidatëve në konkursin e kaluar për drejtor të AAC-së ku në listë të ngushtë ishin futur tre kandidatë që nuk i kishin plotësuar kriteret.
Për pasojë, KPMSHC-ja e pati rikthyer konkursin në fazën e testimit paraprak. Konkursi më pas është anuluar nga AAC-ja dhe është hapur i riu disa muaj pas.
