Një ngjarje e rëndë ka tronditur sot Malishevën, ku një burrë dyshohet se ka vrarë dy vëllezërit e gruas së tij në fshatin Gollubovc, përpara se të arratisej nga vendi i ngjarjes.
I dyshuari, Astrit Isufi, sipas të dhënave zyrtare, është emër i njohur për organet e rendit dhe drejtësisë në Kosovë. Ai kishte qenë më herët nën hetim për dhunë në familje dhe kanosje, dhe ndaj tij ishte ngritur aktakuzë në prill të këtij viti, periudhë gjatë së cilës kishte qëndruar në paraburgim.
Këtë e ka konfirmuar për lajmi.net zyrtarja për informim e Prokurorisë Themelore në Prishtinë, Kaltrina Shala.
“Prokurori i shtetit ndaj personit të dyshuar A.I., më datë 06.04.2025, ka paraqitur kërkesë për caktimin e masës së paraburgimit, e cila po të njëjtit i është caktuar nga gjykata kompetente. Po ashtu, më datë 07.04.2025, Prokuroria Themelore në Prishtinë ka ngritur aktakuzë ndaj të pandehurit për veprat penale ‘Dhunë në familje’ dhe ‘Kanosje’”, ka deklaruar Shala.
Megjithëse Isufi ishte mbajtur në paraburgim, ende nuk dihet kur i është ndërprerë masa e sigurisë, ndërsa sot ai dyshohet se ka kryer krimin e rëndë në Malishevë, duke marrë jetën e dy personave.
Sipas raportimeve fillestare, Astrit Isufi kishte shkuar në shtëpinë e familjes së bashkëshortes për ta marrë gruan e tij. Pas një debati, ai është larguar nga oborri, por më pas është kthyer dhe ka shtënë me armë zjarri ndaj dy vëllezërve të gruas, të cilët ndodheshin para derës së shtëpisë.
Viktimat e këtij rasti, Naim dhe Driton Morina, raportohet se kishin ardhur nga jashtë vendit vetëm tri ditë më parë, për të marrë pjesë në të pamen e babait të tyre, që kishte ndërruar jetë ditë më parë.
Lidhur me këtë rast, ka reaguar edhe Prokuroria Themelore në Gjakovë, e cila ka bërë të ditur se të gjitha njësitë e nevojshme janë në vendin e ngjarjes.
“Në lidhje me rastin, në vendin e ngjarjes kanë dalë të gjitha njësitë e nevojshme të policisë, Kryeprokurori dhe Prokurori kujdestar. Sipas udhëzimeve të prokurorit, policia është duke ndërmarrë të gjitha veprimet për sigurimin e provave në këtë çështje penale”, ka njoftuar Prokuroria e Gjakovës.
