Qeveria e Talibanëve në Afganistan ka shpallur kodin e ri penal, i cili shënon një goditje dërrmuese për të drejtat e njeriut. Rregullat e reja jo vetëm që rikthen skllavërinë, por krijojnë një sistem drejtësie ku dënimi varet nga klasa shoqërore e personit.
Sipas raportimeve të fundit nga mediat ndërkombëtare (AFP), rregullat e reja të Talibanëve përcaktojnë se ligji do të zbatohet në mënyrë të ndryshme bazuar në identitetin fetar, gjininë dhe statusin shoqëror.
RIKTHIMI I SKLLAVËRISË DHE “ZOTËRINJVE”
Në tekstin e ligjit të ri, termat “skllav” dhe “zotëri” përmenden vazhdimisht. Dokumenti i jep të drejtë “zotërisë” që të ketë autoritet të plotë mbi ndëshkimin e skllavit, duke e kthyer vendin zyrtarisht në një sistem skllavërues, i cili ishte zhdukur prej dekadash.
NJË SHOQËRI E NDARË NË KATËR KLASA
Kodi i ri penal e ndan shoqërinë afgane në katër nivele, ku drejtësia nuk është e barabartë për të gjithë:
- Dijetarët fetarë: Nëse kryejnë një krim, ata marrin vetëm një paralajmërim.
- Elita: Përballen me thirrje në gjykatë dhe paralajmërime.
- Klasa e mesme: Dënohen me burgim.
- Klasa e ulët: Përveç burgut, parashikohen ndëshkime fizike (goditje me fshikull, etj.).
DHUNA NDAJ FËMIJËVE DHE NDALIMI I ARSIMIT
Përveç ndalimit zyrtar të arsimimit për vajzat, kodi i ri legalizon dhunën brenda familjes. Dhuna ndaj fëmijëve mbetet e pandëshkuar, me kusht që të mos shkaktohet thyerje kockash apo çarje të lëkurës. Madje, ligji specifikon se një baba ka të drejtë të ndëshkojë djalin e tij 10-vjeçar nëse ai neglizhon faljen e namazit.
DËNIM ME VDEKJE PËR KRITIKËT
Gjykatat e Talibanëve tashmë kanë autoritetin për të dënuar me vdekje këdo që konsiderohet “rebel” apo kundërshtar i regjimit. Qytetarët janë të detyruar me ligj të denoncojnë çdo aktivitet opozitar; në të kundërt, përballen vetë me burgimin.
Pikat e tjera tronditëse të kodit të ri:
- Gjyqësia popullore: Qytetarët lejohen të ndëshkojnë personalisht këdo që shohin duke bërë “mëkat”.
- Ndalimi i muzikës: Vallëzimi dhe shikimi i njerëzve që kërcejnë është rreptësisht i ndaluar.
- Persekutimi fetar: Braktisja e medhhebit Hanefi konsiderohet kufër (mosbesim) dhe dënohet me burg.
- Segregacioni gjinor: Prania e një burri dhe një gruaje në të njëjtin ambient pa pasur lidhje gjaku konsiderohet krim.
Edhe pse komuniteti ndërkombëtar ka alarmuar se këto rregulla shkelin çdo standard të të drejtave të njeriut dhe parimet e gjykimit të drejtë, regjimi i Talibanëve po vazhdon me radikalizimin e plotë të Afganistanit që pas tërheqjes së trupave të SHBA-së në vitin 2021.
