Deputetja Jeta Statovci, nga partia GUXO, në një postim në profilin e saj në Facebook, ka thënë se pas zgjedhjeve të fundit, në të cilat Donika Gërvalla mori mbi 153 mijë vota nga qytetarët e Kosovës, kanë nisur një varg sulmesh politike dhe propaganduese ndaj saj. Sipas saj, këto sulme lidhen drejtpërdrejt me mbështetjen e lartë popullore dhe me zerat se ajo mund të emërohet ministre e Drejtësisë.
“Ditëve të fundit është rikthyer në qarkullim një intervistë e vjetër, e cila po përdoret për ta akuzuar padrejtësisht Gërvallën se kinse ka dërguar dëshmi në Gjykatën Speciale. Megjithatë, në asnjë moment ajo nuk ka deklaruar diçka të tillë. Ironikisht, Gjykata Speciale është krijuar dhe votuar pikërisht nga ata aktorë politikë që sot hedhin akuza pa bazë.
Media, në kuadër të fjalës së lirë, ka të drejtë të publikojë intervista dhe materiale arkivore. Sipas mbështetësve të saj, kjo intervistë nuk e dëmton Donika Gërvallën, por përkundrazi dëshmon vizionin e saj politik, pasi në të ajo parashikonte me saktësi shumë zhvillime të rëndësishme politike të Kosovës.
Në disa reagime publike, është ngritur edhe pyetja cinike: “Ku qëndron fuqia e Donika Gërvallës?”
Fuqia e Donika Gërvallës qëndron në edukimin familjar e patriotik, në një familje që ka dhënë edhe jetën për Kosovën. Ajo buron nga konsistenca në qëndrime, guximi, parimësia, vizioni dhe shpirti i saj demokratik i palëkundur. Prandaj, që kur ajo është në garë politike, Donika Gërvalla është një nga personalitetet më të mbështetura në Kosovë”, ka thënë Statovci.
Statovci thekson se sulmet aktuale nuk janë rastësore, por dëshmi e frikës politike ndaj figurave me integritet dhe mbështetje reale qytetare. Sipas saj, vota masive e qytetarëve është përgjigjja më e qartë ndaj çdo fushate denigruese.
