Liderët e gjashtë vendeve të Ballkanit Perëndimor u takuan me zyrtarë britanikë dhe evropianë në Londër të mërkurën për të diskutuar migracionin, sigurinë dhe rritjen ekonomike. Kryeministri britanik Keir Starmer tha se rajoni është “shkolla e vështirë e Evropës – vendi ku vihet në provë siguria e kontinentit.”
Në samit morën pjesë edhe kryediplomatja e BE-së për politikën e jashtme, Kaja Kallas, kancelari gjerman Friedrich Merz dhe diplomatë të tjerë evropianë. Takimi u zhvillua si pjesë e Procesit të Berlinit, i nisur në 2014 për të ndihmuar vendet e Ballkanit Perëndimor drejt anëtarësimit në BE.
Vetëm Kroacia është anëtare e BE-së, ndërsa përparimi i vendeve të tjera ka ngecur. Tensionet mes Serbisë dhe Kosovës vazhdojnë, ndërsa lufta në Ukrainë dhe përballja e Rusisë me Perëndimin shqetësojnë rajonin.
Britania zgjati pjesëmarrjen e saj në forcën paqeruajtëse të NATO-s në Kosovë deri në fund të vitit 2028. Qeveria britanike po përpiqet të ndalojë rrugët kriminale të migrantëve drejt Mbretërisë së Bashkuar. Sipas Starmer, një e katërta e migrantëve që arrijnë në Britani me varka të vogla përmes Kanalit të Anglisë kanë kaluar përmes Ballkanit Perëndimor.
Britania vendosi sanksione ndaj disa bandave dhe kompanive që lehtësojnë kontrabandën, duke përfshirë rrjetin e falsifikimeve Krasniqi në Kosovë dhe kompaninë ALPA Trading FZCO. Qeveria britanike po punon gjithashtu me Shqipërinë për të reduktuar numrin e migrantëve që përpiqen të arrijnë në MB, duke ulur rastet nga 12,000 në 2022 në rreth 600 në 2024.
Ndërsa Britania kërkon vende që të pranojnë “qendra rikthimi” për kërkuesit e azilit të refuzuar, Shqipëria dhe Mali i Zi kanë refuzuar. Kryeministri shqiptar Edi Rama tha se “kurrë në Shqipëri” nuk do të ketë qendra të tilla, ndërsa Kryeministri i Malit të Zi Milojko Spajic tha se vendi i tij nuk bën pjesë në rrugët e migrantëve, por mund të pranojë një qendër vetëm nëse Britania investon 10 miliardë euro për ndërtimin e hekurudhave.
Samiti i Londrës shënon një përpjekje të Britanisë për të forcuar sigurinë, për të luftuar trafikun e drogës dhe për të mbështetur vendet e Ballkanit Perëndimor ndaj ndërhyrjeve nga Rusia, si dhe për të trajtuar sfidat e migracionit në rrugët drejt Evropës dhe Mbretërisë së Bashkuar. (Burimi: Associated Press).
