Dy personat që mbetën të vdekur të shtunën mbrëma si pasojë e vërshimeve në Pejë, ishin brenda shtëpisë së tyre në momentin kritik, ka bërë të ditur, nënkryetari i Komunës së Pejës, Fatmir Asllani.
Siç mësohet, shtëpia e gruas dhe fëmijës tashmë të ndjerë, është në rrugën “Asllan Qeshme”, afër vendit ku ka pasur shembje të dheut.
Asllani ka njoftuar se aktualisht po bëhet pastrimi i kanalit, i cili është mbushur me zhavorr dhe materiale inerte që i ka bartur uji.
Ai më tej ka thënë se janë diku rreth gjashtë vetura të cilat po ashtu janë bartur brenda në kanal, teksa po punohet për lirimin e tij për shkak të paralajmërimeve se do të ketë të reshura shiu.
“Momentalisht po merremi me pastrimin e kanalit. Është i mbushur me zhavorr, me materiale inerte, janë rreth pesë-gjashtë vetura që i ka gjuajtur brenda. Po mundohemi ta sanojmë problemin. Po paralajmërohet shi, andaj po punojmë në lirimin e kanalit”, ka thënë ai.
Edhe dy persona të tjerë kanë mbetur të lënduar si pasojë e këtyre vërshimeve.
Drejtori i Shëndetësisë në Pejë, Petrit Loci, ka thënë për KOHËN se gjendja e tyre është stabile.
Nga pamjet e publikuara deri tani vërehen dëmet e mëdha materiale të shkaktuara, për të cilat po punohet për t’u evituar.
Për gjendjen e rëndë në Pejë, kryeministri Albin Kurti ka njoftuar se janë ngritur kapacitetet e Qeverisë me Forcën e Sigurisë së Kosovës dhe Agjencisë për Menaxhimin e Emergjencave që të ndihmohet në përballimin dhe tejkalimin e pasojave.
“Ministri i Mbrojtjes, Armend Mehaj, Ministri i Punëve të Brendshme, Xhelal Sveçla dhe Ministri i Administrimit të Pushtetit Lokal, Elbert Krasniqi, janë në komunikim me Komunën e Pejës për të koordinuar veprimet në ofrim të mbështetjes së nevojshme”, ka shkruar Kurti në Facebook.
Edhe presidentja Vjosa Osmani ka konsideruar se Komuna e Pejës duhet të përkrahet në mënyrë që të përballojë dhe të rikuperohet nga situata e krijuar.
Dy partitë opozitare, Lidhja Demokratike e Kosovës dhe Aleanca për Ardhmërinë e Kosovës, teksa kanë shprehur ngushëllime për vdekjen e gruas dhe të birit të saj pesëvjeçar, kanë kërkuar nga Qeveria që të ngrejë të gjitha kapacitetet në mënyrë që qytetarët e Pejës ta tejkalojnë sa më lehtë këtë situatë.
