Policia në Korenë e Jugut ka arrestuar katër persona të cilët dyshohet se kanë hakuar mbi 120 mijë kamera sigurie në shtëpi dhe biznese, duke publikuar më pas në internet video me përmbajtje seksuale të marra nga këto pajisje, transmeton KosovaNews.
Sipas autoriteteve, grupi ka shfrytëzuar dobësi të thjeshta të sigurisë, si fjalëkalime të lehta të kamerave IP. Këto kamera, që lidhën me rrjetin e internetit të shtëpisë dhe përdoren shpesh për të monitoruar fëmijët apo kafshët shtëpiake, janë bërë objektiv i lehtë për hakerët.
Në mesin e kamerave të komprometuara ndodheshin banesa private, studio sportive dhe madje një klinikë gjinekologjike.
Disa nga të dyshuarit kanë vepruar individualisht, jo si grup i organizuar, ka bërë të ditur policia për BBC-në.
Njëri nga hakerët depërtoi në 63 mijë kamera
Hetimi zbuloi se njëri prej të arrestuarve kishte hyrë ilegalisht në 63 mijë kamera, kishte siguruar 545 video me përmbajtje seksuale dhe i kishte shitur ato në këmbim të 12,235 dollarëve në kriptovaluta. Një tjetër dyshohet se ka sulmuar 70 mijë kamera dhe ka shitur 648 video.
Policia theksoi se dy prej të dyshuarve janë përgjegjës për rreth 62% të të gjitha videove të shpërndara në një faqe të paligjshme ku qarkullonin pamje të tilla vitin e kaluar.
Tre persona që kishin blerë dhe shikuar këto video janë ndaluar gjithashtu, ndërsa autoritetet kanë nisur procedurat për mbylljen e faqes së internetit ku shpërndaheshin pamjet.
Zyrtarët kanë njoftuar se personat e identifikuar në video janë kontaktuar dhe janë udhëzuar të ndryshojnë menjëherë fjalëkalimet e kamerave të tyre./KosovaNews/
