Në ambientet e Shtëpisë së Fellbahut në Suahrekë dje u promovua libri i ish-ushtarit të Ushtrisë Çlirmtare të Kosovës njëherit autor i librit Nuhi Sopa “Ballë për ballë bishave të egërsuara – Ditar lufte nën krismat e tokës së përgjakur“. Libri është një ditar lufte i ish-ushtarit të UÇK-së Nuhi Sopa i cili përjetimet e tij gjatë luftës tashmë i ka botuar në mënyrë kronologjike në librin e tij si një dëshmi e pakontestueshme e ngjarjeve të luftës dhe sakrificës së Popullit Shqiptar për liri.
Në këtë promovim morën pjesë dhjetëra veteranë të luftës njëherit edhe bashkëluftëtarë të autorit , familjarë të dëshmorëve si dhe bashkëveprimtar të çështjes kombëtare nga të gjitha trojet shqiptare.
Redaktori i këtij libri Xhemajl Kolgeci tha se autori i këtij libri është protagonist i ngjarjeve të viteve 1998\99 së bashku me shokët e tij të luftës dhe idealit. Të gjithë personazhet e librit janë me emrat e tyre të vërtetë të bazuara me fotografi dhe dokumente autentike.
Në këtë libër lexuesi gjenë të vërtetën e luftës së UÇK-së ku ngjarjet janë të përshkruara ashtu siç ishin pa zbukurime e zmadhime. Ngjarjet e luftës në rajonin e Suahrekës janë përshkruar në mënyrë reale pa i fshehur ndonjëherë edhe zhgënjimet me ndonjë komandant të papërgjegjshëm që ikte nga fusha e betejave duke i lënë ushtarët në vijat e frontit.
Autori Nuhi Sopa para të pranishmëve tha se në këtë libër ka përmbledhur të gjithë aktivitetin dhe kontributin e tij për çështjen kombëtare e në veçanti periudhën e luftës kur ishte rreshtuar në radhët e UÇK-së. Ai tha se ngjarjet i ka të përshkruara dhe të bazuara vetëm në atë se çfarë ka përjetuar ai vet dhe jo mbi bazën e thashethemeve apo keqinterpretimet e të tjerëve prandaj nuk ka dashur të komentoj ngjarje e rrethana ku nuk ka qenë protagonist i tyre.
