Presidentja e Republikës së Kosovës, Vjosa Osmani, ka theksuar se siguria në vend garantohet përmes angazhimit të përditshëm dhe bashkëpunimit me partnerë të besueshëm, duke veçuar rolin e KFOR-it dhe NATO-s në ruajtjen e paqes dhe stabilitetit.
Gjatë një takimi me Komandantin e KFOR-it, gjeneralin Özkan Ulutaş, Presidentja Osmani e falënderoi atë për lidershipin dhe kontributin e misionit të KFOR-it në funksion të sigurisë për të gjithë qytetarët e Republikës së Kosovës, pa asnjë dallim.
“Siguria garantohet me angazhim të përditshëm dhe partnerë të besueshëm. E falënderova Komandantin e KFOR-it, Özkan Ulutaş, për lidershipin e tij dhe për rolin e KFOR-it në funksion të sigurisë për të gjithë qytetarët e Republikës së Kosovës, pa dallim,” ka deklaruar Osmani.
Ajo ka theksuar se bashkëpunimi i ngushtë me NATO-n mbetet thelbësor jo vetëm për Kosovën, por edhe për stabilitetin e rajonit më gjerë, sidomos në një kontekst të sfiduar nga veprime të vazhdueshme destabilizuese.
“Shteti i Kosovës mbetet i përkushtuar ndaj bashkëpunimit të ngushtë me NATO-n për ruajtjen e paqes dhe sigurisë në Kosovë dhe në rajon, veçanërisht përballë veprimeve të vazhdueshme destabilizuese të Serbisë,” ka theksuar Presidentja.
Takimi riafirmoi partneritetin e fortë ndërmjet institucioneve të Kosovës dhe KFOR-it, si dhe përkushtimin e përbashkët për siguri, paqe dhe stabilitet afatgjatë.
