Analisti Xhevdet Pozhari, në një postim në profilin e tij në Facebook, ka thënë se kushdo që tenton të shantazhojë fituesin zgjedhor për favore të pamerituara rrezikon të çojë vendin në zgjedhje të reja – jo në pazare. Ai e ka përmbledhur në 10 pika atë që e cilëson si ndryshim thelbësor në modelin e qeverisjes në Kosovë, pas zgjedhjeve dhe konstituimit të Kuvendit.
Ai ka thënë se tani kemi një ndryshim të modelit të qeverisjes në Kosovë, që tenton të vendosë standarde të reja të funksionimit politik.
Në qendër të tij janë legjitimiteti elektoral, refuzimi i pazareve politike, ruajtja e interesit shtetëror dhe shkëputja nga ndikimi i Beogradit përmes Listës Serbe”, ka thënë Pozhari.
Në analizën e tij, Pozhari vë në pah ndarjen e qartë mes Kuvendit dhe Qeverisë, vendosjen e një standardi të ri mbi fuqinë elektorale si bazë për ndarjen e pushtetit dhe përjashtimin e praktikave të vjetra të pazareve politike dhe varësisë nga Lista Serbe.
“Pra, sot kemi një ndryshim të modelit të qeverisjes në Kosovë, që tenton të vendosë standarde të reja të funksionimit politik. Në qendër të tij janë: legjitimiteti elektoral, refuzimi i pazareve politike, ruajtja e interesit shtetëror dhe shkëputja nga ndikimi i Beogradit përmes Listës Serbe,” – ka shkruar Pozhari në Facebook.
Ai përmend gjithashtu se zgjedhja e Nenad Rashiq si nënkryetar i Kuvendit, në vend të një përfaqësuesi të Listës Serbe, është një hap i qëllimshëm për të ulur ndikimin e Beogradit në institucionet e Kosovës.
Postimi i tij vjen në një kohë kur janë shtuar diskutimet rreth krijimit të institucioneve të reja pas zgjedhjeve dhe mënyrës se si ato reflektojnë vullnetin qytetar dhe pavarësinë institucionale.
