Ad image

Scholz jep mbështetje për liberalizimin e vizave për Kosovën, kërkon njohje reciproke Kosovë-Serbi

Kreshnik Llabjani
Kreshnik Llabjani 12:13 -10/06/2022

Kancelari i Gjermanisë, Olaf Scholz ka thënë të premten në Prishtinë se liberalizimi i vizave për Kosovën duhet të shkoj përpara dhe për këtë pohoi se është duke u angazhuar brenda BE-së, ndërsa ka bërë thirrje që të vazhdohet dialogu mes Kosovës dhe Serbisë, i cili duhet të përfundoj  me njohje reciproke.  

Kryeministri i vendit, Albin Kurti dhe kancelari gjerman, Olaf Scholz po mbajnë konferencë për media, me ç’rast po flasim për temat që janë dakorduar t’i çojnë përpara si dy vende që kanë një partneritet të mirë mes vete.

Kancelari gjerman Olaf Scholz  ka shprehur falënderime për mikpritjen në Kosovë dhe për arritjen e bashkëpunimit të deritashëm, raporton Kosovanews.

Ai tha se Kosova është pozicionuar qartë karshi luftës dhe agresionit të Rusisë në Ukrainë.

“Kosova është pozicionuar qartë dhe kjo është pozitive. Dialogu duhet të qohet përpara dhe Kosova e Serbia duhet të gjejnë një zgjidhje dhe procesi duhet të përfundoj  me njohjen e Kosovës, sepse ndryshe nuk ka kuptim”, ka thënë mes tjerash kancelari gjerman.

Ai tha se edhe liberalizimi i vizave për Kosovën duhet të shkoj përpara dhe për këtë po angazhohet brenda Bashkimit Evropian.

Kurse kryeministri i vendit, Albin Kurti e ka falënderuar kancelarin gjerman që për herë të parë në historinë e vendit tonë viziton institucionet që nga shpallja e pavarësisë së Kosovës.

Kurti në këtë rast ka kujtuar se Kosova është 2 ditë para përvjetorit të çlirimit dhe ka falënderuar Gjermaninë që ka kontribuar për çlirim dhe ndërtimin e shtetit të Kosovës, nga shkatërrimet e mëdha që ka përjetuar prej agresionit të Serbisë.

“Ne jemi për dialog dhe ne jemi treguar të përkushtuar, por Serbia po bllokon marrëveshjet  dhe ecjen përpara sipas procesit të Berlinit”, ka potencuar Kurti.

Ai tregoi se nga Gjermania ka marrë edhe mbështetjen e plotë për anëtarësim në Këshill të Evropës.

“Kërkesa jonë  për mbështetje për anëtarësim në Këshill të Evropës ka hasur në mirëkuptim të plotë, do të vazhdojmë edhe në aspiratën tonë për aplikim në BE fund të këtij viti”.

Kancelari i Gjermanisë, Olaf Scholz e ka nisur vizitën e tij të parë në Ballkanin Perëndimor dhe shteti i parë që po e viziton është Kosova, Madje është hera e parë që një kancelar gjerman viziton institucionet e vendit tonë.

Scholz në Kosovë, përveç takimeve me krerët institucionalë, pritet të vizitojë edhe trupat gjermane në kuadër të KFOR-it./Kosovanews/

Shpërndaje