Gratë në Kosovë po vazhdojnë edhe me tej të diskriminohen në tregun e punës, andaj edhe është kërkuar nga institucionet që të punojnë më shumë drejtë barazisë gjinore.
Në konferencën rajonale “Perspektiva parlamentare për barazinë gjinore dhe qëndrueshmërinë demografike në Ballkanin Perëndimor, kryeparlamentari Glauk Konjufca tha se ka ende shumë punë për të bërë drejtë barazisë gjinore.
“Në disa aspekte ka pak progres kurse në disa tjera edhe prapa kthim. Kosova i është përgjigjur kësaj agjende duke i marrë masat e nevojshme. Duhet edhe shumë më shumë masa të marrim. Por ato që ishin fillestare ishin që Kosova u bë pjesë e kësaj agjende e pastaj Kuvendi e themeloi një grup që merret me këto objektiva. Çështjet për të cilat jemi mbledhur janë etike. Baza e jetës tonë është barazi në mes burrave dhe në mes grave, pastaj krijimi i kushteve të nevojshme ekzistenciale dhe jetësore që njerëzit të mund të jetojnë në vendin e tyre dhe të shohin perspektivë. Këto janë elementare edhe për mirëfunksionimin e shtetit”, tha ai.
Ndërsa, zëvendëskryeministrja Emilia Rexhepi deklaroi se qeveria ka vendosur lartë të drejtat e grave dhe se është duke punuar drejtë barazisë gjinore.
“Duhet të dëshmojmë që qeveria dhe institucionet janë të përkushtuara në këtë agjendë. Kjo qeveri ka vendosur të drejtat e grave shumë lartë”, u shpreh Rexhepi.
Deputetja e Lëvizjes Vetëvendosje, Fatmire Kollçaku potencoi po ashtu se qeveria ka marrë masa drejt zbatimit të politikave gjinore në mënyrë që grave t’i mundësohet që të ndjekin karrierën e tyre.
“Askush të mos lihet mbrapa, kjo është një prej parimeve kryesore të cilën mundohemi ta shtyjmë përpara. Parimi është mase i qëlluar për shkak të grave të cilat historikisht janë lënë mbrapa dhe janë margjinalizuar. Gratë kanë qenë ato që kanë sakrifikuar. Politikat gjinore janë masat më të mira që janë marrë nga qeveria. Politikat sensitive gjinore janë masa më e mirë për t’i mundësuar grave karrierën dhe realizimin e ëndrrave të tyre”, tha ajo.
