Një delegacion i Policisë së Kosovës, i kryesuar nga drejtori i përgjithshëm Gazmend Hoxha, realizoi një vizitë zyrtare në Ankara nga 29 deri më 30 maj 2025, ku u zhvilluan takime me autoritetet turke të sigurisë. Vizita kishte për qëllim shkëmbimin e përvojave dhe forcimin e bashkëpunimit në luftën kundër krimit të organizuar, narkotikëve, terrorizmit dhe krimeve kibernetike.
Gjatë vizitës, delegacioni zhvilloi takime të rëndësishme në departamentet kryesore të sigurisë, duke përfshirë hetimin kundër krimit të organizuar, narkotikëve, terrorizmit, krimeve kibernetike, njësive speciale dhe aviacionit policor. Delegacioni vizitoi gjithashtu mauzoleun e Ataturkut dhe Akademinë Policore të Ankarasë. Ai u prit zyrtarisht edhe nga drejtori i përgjithshëm i sigurisë së Turqisë.
Në fokus të takimeve ishte shkëmbimi i përvojave dhe praktikave më të mira në luftën kundër krimit të organizuar, trafiqeve të paligjshme, narkotikëve, terrorizmit dhe krimeve kibernetike. Ndër qëllimet kryesore të vizitës ishte edhe fuqizimi i kapaciteteve policore në fusha të ndryshme që ndikojnë në realizimin e objektivave strategjike të Policisë së Kosovës.
Po ashtu, u diskutua për intensifikimin e bashkëpunimit operativ dhe zhvillimin e trajnimeve të përbashkëta me qëllim ngritjen e kapaciteteve profesionale të dy institucioneve.
Kolonel Gazmend Hoxha falënderoi autoritetet turke për mikpritjen dhe gatishmërinë për bashkëpunim, duke theksuar se këto takime përforcojnë partneritetin strategjik ndërmjet dy vendeve dhe përfaqësojnë një hap konkret drejt forcimit të sigurisë dhe rendit publik.
“Palët u zotuan të vazhdojnë komunikimin e ngushtë dhe të ndërmarrin hapa konkretë për realizimin e aktiviteteve të përbashkëta që do të kontribuojnë në sigurinë e qytetarëve të të dyja shteteve. Të dy palët vlerësuan se takimet e tilla e tilla janë tejet të rëndësishme dhe kontribuojnë në thellimin e bashkëpunimit policor në nivel shtetesh”, theksohet në njoftim.
