Komuna e Podujevës përmes një reagimi e ka demantuar atë që ka shkruar një ditë më parë Gazeta “Insajderi”, ku thuhet se veturat e komunës do të bëjnë me qindra kilometra për të shkuar për pastrim në Prizren.
Në reagimin e saj, komuna e Podujevës thotë se lajmi i Gazetës Insajderi se “Prokurimi i Bulliqit i jep tender kompanisë nga Prizreni për pastrimin e veturave zyrtare të komunës së Podujevës”, është tendencioz dhe me shumë të pavërteta.
“Kur është bërë lajmi se operatori ekonomik për larjen e automjeteve zyrtare të Komunës së Podujevës ka bazën e saj në Prizren, është anashkaluar qëllimshëm një fakt shumë i rëndësishëm – marrja në shfrytëzim të “Auto Larje Rremi” në Podujevë nga fituesi i kontratës për të ofruar shërbimin”, thuhet në reagim.
Tutje sqarohet se gjatë inicimit të procedurave të prokurimit për këtë tender është bërë një lëshim teknik nga zyra e prokurimit, megjithatë gjatë zhvillimit të procedurave dhe para se të shpallet fitues operatori ekonomik “GEO Group Ing”, atij i është kërkuar nga zyra e prokurimit në Podujevë që të dokumentojë se ka përfaqësi ose nënkontraktor në Komunën e Podujevës.
“Me këtë rast OE ka dorëzuar kontratën me qira që ka nënshkruar me “Auto Larje Rremi”, i cili autolarjen e ka në rrugën “Skënderbeu – tash rruga Xhemajl Mustafa” në Podujevë. Duke u bazuar mbi këto fakte dhe në ligjin e prokurimit publik zyra e prokurimit ka shpallur fitues kompaninë në fjalë, e cila edhe ka qenë e vetmja që ka konkurruar për realizimin e kësaj kontrate”, thuhet nga komuna.
Në këtë rast komuna e Podujevës ka publikuar edhe marrëveshjen me qira që ka nënshkruar OE me “Auto Larje Rremi”, e që nënkuptohet se veturat do të pastrohen në Podujevë dhe jo siç ka shkruar “Insajderi” në Prizren.
