Partia Demokratike e Kosovës ka paralajmëruar padi ndaj deputetit të Lëvizjes Vetëvendosje, Artan Abrashi, lidhur me deklarimin e tij për u.d. së kryetarit të OVL-UÇK-së, Faton Klinakun dhe ndërlidhjen që e bëri me PDK-në.
Anëtari i Kryesisë së PDK-së, Betim Gjoshi, i tha kohës se deklarimet e Abrashit, se Klinaku “është instrument politik i PDK-së”, janë absurde, të liga, fyese e qesharake.
“PDK-ja tashmë ka përgatitur padinë për shpifje ndaj deputetit Artan Abrashi, e cila do t’u dorëzohet organeve të drejtësisë. Me shpifje të tilla do të merret vetëm drejtësia dhe ne presim që të gjithë, pa përjashtim, edhe zyrtarët publikë, të marrin dënimin e merituar”, ka thënë Gjoshi të mërkurën.
Sipas zyrtarit të partisë në opozitë, deklarimi i Abrashit nuk do të mbulojë “humnerën në të cilën ka rënë ky shtet”.
Deputeti i Lëvizjes Vetëvendosje, Artan Abrashi, ka akuzuar Partinë Demokratike të Kosovës se “nuk e ka braktisur vrasjen si mjet ndaj kundërshtarëve të vet”. Në një reagim pas shkrimit të ushtruesit të detyrës së…
“Megjithatë, as një deklaratë e tillë, e pabazuar dhe shpifëse, nuk do të arrijë të mbulojë humnerën në të cilën ka rënë ky pushtet – përmes aferave të vazhdueshme abuzive dhe korruptive. Koordinimin me kriminelët serbë, vjedhjen e rezervave shtetërore, hajninë me energjinë, trafikimin e lëndëve narkotike dhe keqqeverisjen – nuk kanë më fuqi dhe kredibilitet, as moral e as politik, që ta mbrojë askush – aq më pak një deputet i Kuvendit i cili është rekordmen i vjedhjes së mëditjeve për udhëtime – pa i bërë fare ato”, ka shtuar ai.
Faton Klinaku, ushtruesi i detyrës së kryetarit të Organizatës së Veteranëve të Luftës së Ushtrisë Çlirimtare të Kosovës (OVL-UÇK), është intervistuar nga Policia e Kosovës, pas një postimi në rrjetin…
Abrashi është shprehur të mërkurën se u.d i kryetarit të OVL-UÇK-së është ndërgjegjja e PDK-së, derisa ka shtuar se përdorja e shprehjes “vrasje” nga Klinaku “është dëshmi e qartë që PDK-ja në regjistrin e saj ende s’e ka braktisur vrasjen si mjet ndaj kundërshtarëve”.
