Presidentja e Kosovës, Vjosa Osmani ka thënë se Kosova është e gatshme të bëjë gjithçka si shtet për të dëshmuar pastërtinë e luftës së Ushtrisë Çlirimtare të Kosovës (UÇK).
E para e vendit këtë deklaratë e ka dhënë pasi është pyetur nga gazetarët në lidhje me procesin gjyqësor të ish-krerëve të UÇK-së në Hagë.
Ajo beson se drejtësia do të triumfojë sërish siç ka triumfuar në instancat e tjera të drejtësisë.
“Ne besojmë se drejtësia sërish do të triumfojë siç ka triumfuar më parë në të gjitha instancat e tjera të drejtësisë, besojmë se vendimi final do ta dëshmojë për të disatën here me radhë se lufta e UÇK-së ka qenë luftë e drejtë për të mbrojtur të pambrojturit civilë të cilët po sulmoheshin barbarisht nga forcat gjenocidale të Serbisë”, ka thënë Osmani.
Ajo ka thënë se institucionet e Kosovës janë në kontakt të vazhdueshëm me avokatët dhe me palët e tjera që çdo hap të jetë në ndihmë të drejtësisë e jo në dëmtim të procesit gjyqësor.
“Drejtësia do të triumfojë dhe do të dëshmojë se ka qenë luftë e pastër dhe për liri. Ne po bëjmë çmos çfarë është në duart tona për ti mbështetur ata, jemi në kontakt të vazhdueshëm me avokatët që çdo hap i yni të jetë që i ndihmon drejtësisë, jo ti dëmtojë ata gjatë këtij procesi. Jemi të gatshëm të bëjmë gjithçka si shtet, që të gjithë së bashku ta dëshmojmë pastërtinë e luftës së UÇK-së, sepse ka qenë një luftë çlirimtare për liri për të çliruar vendin nga okupatori serb”, ka vijuar Osmani.
