Policia e Kosovës ka shënuar sot 26-vjetorin e themelimit, një nga institucionet më të besueshme dhe më të respektuara në vend. Në ceremoninë solemne morën pjesë Presidentja Vjosa Osmani, Kryeministri në detyrë Albin Kurti, Kryetari i Kuvendit Dimal Basha, ministri i Punëve të Brendshme Xhelal Sveçla, drejtori i Policisë së Kosovës Gazmend Hoxha dhe përfaqësues të institucioneve vendore e ndërkombëtare.
Presidentja Vjosa Osmani e quajti Policinë “mburojë të Republikës” dhe shprehu mirënjohje për përkushtimin dhe guximin e pjesëtarëve të saj. “Përulemi me nderim para policëve që ranë në krye të detyrës dhe shprehim mirënjohje për çdo polic e police që çdo ditë i mbajnë të forta themelet e shtetit tonë”, u shpreh ajo, përcjell KosovaNews.
Policia e Kosovës, 26 vjet qëndresë, besnikëri dhe guxim! Nga ditët e para të themelimit e deri sot, Policia jonë ka…
Posted by Vjosa Osmani on Saturday, September 6, 2025
Ndërkaq, kryeministri në detyrë Albin Kurti, në fjalën e tij, theksoi se Policia e Kosovës është themeli i sigurisë së Republikës dhe se institucionet do të qëndrojnë gjithmonë pranë saj. Ai përkujtoi me nderim heronjtë Afrim Bunjaku e Enver Zymeri dhe të gjithë policët që ranë në krye të detyrës. Kurti foli edhe për përpjekjet e policisë gjatë vitit, duke theksuar aksionet në veri, çmontimin e strukturave ilegale dhe forcimin e kapaciteteve operacionale.
“Ky përvjetor nuk është thjesht një shënim i një date, por dëshmi e rrugës sonë të përbashkët si shtet dhe si shoqëri. Policia ka treguar se është institucion i të gjithëve, duke përfshirë gra, burra dhe pjesëtarë nga komunitete të ndryshme”, tha Kurti, duke shtuar se Kosova renditet ndër vendet më të sigurta në botë sipas vlerësimeve ndërkombëtare.
Mbi shumë sfida e duke shënuar plot arritje, Policia jonë me besnikërinë e saj ndaj qytetarëve dhe Republikës ka treguar…
Posted by Albin Kurti on Saturday, September 6, 2025
Edhe kryetari i Kuvendit, Dimal Basha, theksoi se Policia e Kosovës është bërë simbol i shtetit të pavarur, duke garantuar sigurinë dhe luftuar me vendosmëri krimin e organizuar, si në jug ashtu edhe në veri të vendit. Ai nënvizoi mirënjohjen e Kuvendit për guximin dhe sakrificën e policëve, duke kujtuar me nderim ata që dhanë jetën për mbrojtjen e integritetit të vendit.
Sonte bashkë me Presidenten Osmani, Kryeministrin Kurti, dhe Ministrin Sveçla ishim mysafirë të drejtorit Gazmend Hoxha,…
Posted by Dimal Basha on Saturday, September 6, 2025
Në mesazhet e tyre, krerët e shtetit u zotuan për mbështetje të vazhdueshme për Policinë e Kosovës, si në përmirësimin e kushteve të punës, ashtu edhe në sigurimin e pajisjeve moderne, për të garantuar rend, ligj dhe siguri për të gjithë qytetarët./KosovaNews/
