Prokuroria Themelore në Prizren ka ngritur aktakuzë ndaj zyrtarëve komunalë dhe përfaqësuesit të një kompanie private për veprat penale të keqpërdorimit të pozitës zyrtare dhe mashtrimit në prokurim publik.
Aktakuza lidhet me një tender publik për “Renovim dhe mirëmbajtje të objekteve të Komunës”, ku dyshohet se zyrtarë të Komunës, në bashkëpunim me kompani private, kanë favorizuar në mënyrë të paligjshme operatorë ekonomikë, duke shpërfillur oferta të tjera me çmime më të ulëta.
Sipas aktakuzës, kontrata është menaxhuar në mënyrë të papërgjegjshme, duke rezultuar në realizimin e pjesshëm të punëve dhe duke shkaktuar dëm financiar në buxhetin e Komunës së Prizrenit, i cili vlerësohet mbi 412 mijë euro.
Lëvizja Vetëvendosje, Qendra në Prizren, e ka mirëpritur ngritjen e kësaj aktakuze, duke e konsideruar rastin si dëshmi të kapjes së institucioneve në nivel lokal.
Ata theksojnë se qytetarët e Prizrenit meritojnë një qeverisje të ndershme dhe transparente.
Nuk ka ende një reagim zyrtar nga Komuna e Prizrenit apo nga zyrtarët e përmendur në aktakuzë. Procesi gjyqësor pritet të zbardhë detaje të mëtejshme rreth kësaj çështjeje.
